Denon artean Ahal Dugu
Ezker abertzalearen inguruko GUaz aritu nintzen huskeriatan azkeneko sarreran. GU trinko eta higiezin horri uko egin eta GU likido bati bidea utzi behar ziola iradokiz-edo; beti ere egungo jendartearengana ahalik eta zuzenen iristea baldin bada Ezker Abertzalearen xedea.
Euskal Herrian Gu likidoak bereganatzen iaioena Ahal Dugu izaten ari da duda izpirik gabe, kolore eta esparru guztietako boto emaileak erakartzeko gai izan delako. EH Bildun hasi eta PPn bukatu. To! Ahal Dugu alderdi berriak Euskal Herrian duen hauteslegoaren zerrenda. Akaso, EAJren arrakastaren sekretua ere horretantxe zertzen da, EAJk ere demostratu duelako urteen igaroan gustu guztietako bozkak erakartzeko ahal dibinoa, testuingurua dena delarik ere. EAJrena gaian adituagoa den bati utzi eta Ahal Duguk darabilen hizkuntza berri horri botako diogu zirtoa, bitxia egiten baita zenbaitetan Iglesiasen alderdiak erabiltzen duen hizkuntza jolasa.
Hala, Ahal Dugu alderdiarekiko pertenentzia likidoa edo joan etorriko boto emailearen nolakotasuna azaltzeko hainbat iritzi elkar trukatu ditzakegun arren, bada hitz magiko bat Ahal Duguk patentatu eta besteei hitz horretarako ailegaera oztopatu diena: denok da hitza! Aste honetan bertan izan dugu ele hori irakurtzeko parada Pili Zabala Ahal Duguren EAEko Lehendarigai izateko hautagaietako baten ahotan. Honela zioen Berriari eskeinitako elkarrizketaren lerroburuak: “ Denok eroso sentitzeko eredu bat topatzen saiatu behar dugu ”.
Kontua ez da, ordea, Pili Zabalak elkarrizketa batean denok hitza bi-hirutan adierazi izana, berdina aipatu zezaketen eta Otegik, Mendiak nahiz Urkulluk berak beste entrebista batean. Kontua da Ahal Duguren hizkeran halako esakerak maiz agertzen direla. Gogoan dut sare sozialetan ere euskararen gaineko eztabaida batean Ahal Duguko jarraitzaile batek euskararen inguruan alderdi moreak egindako akatsak denon artean zuzendu beharreko ariketa gisa planteatu zuenekoa:
Zurekin hari duguhttps://t.co/BBivcfjNX5 pic.twitter.com/X9gUBBEMSO
— txerren (@txerren) June 18, 2016
@boligorria @enekolazabal @txerren @PodemosEuskadi_ Ados, guztion laguntzarekin!
— Andeka Larrea (@andekalarrea) June 18, 2016
@txerren @boligorria @enekolazabal @PodemosEuskadi_ Jakina. Alderdiena da ardura baina kanporik laguntzea ondo dago, hobetzeko bada.
— Andeka Larrea (@andekalarrea) June 18, 2016
Orain ez gara GU, orain denok gara
Horretan datza, esaterako, Ezker Abertzalearen eta Ahal Duguren arteko alde nabarmenetako bat. Ahal Duguk Ezker Abertzalearen GUa garatu eta GU malguago bat landu du, denok hitzean islatzen dena. Izan ere, Ahal Dugun espainiar soilik sentitzen direnak nahiz euskaldun soilik sentitzen direnak aurki ditzakegu elkar bizitzen inolako arazorik gabe, arrakastaren bidea erraztuz.
Uste dut, beraz, irekitako espazio berri horretan, non jendeari ez zaion alderdiarekiko pertenentzia engaiaturik eskatzen, etorkizuneko politikaren jokabideak marraztu daitezkeela. Hartara, alderdi politikoen zeregin berria denok kontuan hartuko gaituzten proiektuak aurkeztea izango da; Ahal Duguk denbora darama horretan, Otegiren azken adierazpenak ere ildo bertsutik dihoaz azkenaldian. Afera, baina, denok hori zein noranzkotan bideratzen den izango da: unionismorako noranzkoan ala deskonexiorako noranzkoan ala…
Denon artean Ahal Dugu
Denon artean Ahal Dugu bidalketa lehenengo ZUZEU-(e)n agertu zen.