Arrainak
![Arrainak]( "Arrainak")
Demagun ibai bat dela teknologiaren eta informazioaren jendartea, korronte bizi-bizikoa. Eta zu eta ni arrainak garela, beste milioika diren bezala. Laster batean aurrera, beheruntz, jarioak nora garamatzan ezin asmatuta. Elkarri apenas begiratzen diogula, denbora galtzearen beldurrez. Inertziaz bizkor, ia hegatsei eragin beharrik gabe.
Demagun arrain zaharrenak eta arrain eszeptikoak daudela. Ubidearen alboetara ihes egiten dutenak. Ez baitute ur bizien meneko dantza egin nahi. Arrotzak baitzaizkie ur gehiegi oxigenatuak eta ur azaletako apar eta zurrunbilo larderiatsuak. Nahiago baitituzte ertzetako putzu geldoak, sustrai azpietako zuloak. Landare berberari begira egotea, bere zain eta bihurgune bakoitza ezagutu arte. Nahiago baitituzte solasaldiak eta denborari denbora ematea.
Demagun badirela arrain batzuk korrontearen aurka igeri egiten dutenak. Izokinek nola salto eginez, inork baino indartsuago eta determinazio gehiagoz hegatsei eraginez. Urjauzietan gora, bizio eta inertzia denen aurka.
Lehenak beherantz doaz, noraezean, korrontearen meneko. Bigarrenak arrantzatu egiten dituzte ur geldoetan, eskura eta zaurgarri. Hirugarrenak hartzen bazka dira.